رثائي لشقيقي الشاعر سيد الموجي / د. ناهد الموجي

قصيدتي اليوم
رثائي لشقيقي الشاعر سيد الموجي / د. ناهد الموجي
...................................................قضاء الله وقدره وحكمته فينا
بيخلقنا بكن فيكون وبهدينا
هدية غالية تفرح بيها أهالينا

وكان الموجي أغلى هديه لامه وابوه
وكل اللي قابلهم او فى يوم سمعوه
زرع حبه ف قلوب الناس طرح .حصدوه

حباه ربه بجينات الشعر والمزمار
فى صوته اللي العقول من نغمته تحتار
وكان حبك يا موجي قرار ما منه فرار
وكان لي المرس والمركب ودفء الدار
واسمي لما جيت للدنيا هو اختار
وقال ناهد هسميها ولما اكبر نروح مشوار

شريط الذكريات بينا كتير دوار
مابين عقلي واحساسي عتي وجبار
سواء دلوقتي او وقت اما كنا صغار

يا موجي

يا شبعي وقت إحساس بالم الجوع
عشانك قلبي من بين الضلوع مخلوع
يا مرساتي ومركب حركتها قلوع

يا موجي

وكنت الشط والمينا وسفر مشروع
يا شمسي الدافية وف ليلي نغم وشموع
يا دم بيجري فى وريدي كما الينبوع

يا موجي

شعور بشبه جبال الخوف
باني عايشة بتنفس واحس وأشوف
وانك يا ضيا عيني مسجى فى الضلام مكتوف
وبالكفن الأخير ملفوف

يا موجي

شعور بشبه مناخ بارد
بيرعش قلبي انا الشارد
اشد النوم يغطيني
ولما انعس يدفيني
ووحدك يا شبيه عيني
فى قبرك والسكات جاحد
وكل ادان على مر الفراق شاهد

يا موجي

شعور بمرارة الايام
وانا بارادتي اقوم وانام
واكتب شعر واحكي كلام
وعمرك يا رفيق عمري فى بحر ظلام
غرق أبدي لا بان ولا عام
ولا ماسك لأمره زمام

يارب اوهب له نور على نور
ويسر له الخفى المستور
وجنة والبنات الحور
ومسك وزعفران وبخور
وبشرى تملا قلبه سرور

بقلمي

رثاء
شقيقي الشاعر سيد الموجي
ناهد الموجي
شاعرة مصرية